“Әлки хәбәрләре” район газетасына 3 мең кеше язылырга өлгергән

“Әлки хәбәрләре” газетасына 3 мең кеше язылырга өлгергән.

2018 елның беренче яртыеллыгына вакытлы матбугатка язылу дәвам итә. Районда барысы 5947 данә газета-журналга язылганнар. Шуның 3 меңе – “Әлки хәбәрләре”. Моннан тыш, “Ватаным Татарстан” газетасына – 445 кеше, “Республика Татарстан”га – 356, ә “Татарстан” журналына – 69 кеше подписка рәсмиләштергән.

Матбугатка яздыру буенча Иске Камка, Иске Алпар, Иске Салман, Юхмачы почта бүлекчәләре яхшы эшлиләр. Ә менә Кошки, Әхмәт, Чуаш Кичүе, Апак, Базарлы Матак авылларында газета-журналларга яздыруны  җанландырырга кирәк әле.

Традиция буенча, 2018 елның беренче яртыеллыгына “Әлки хәбәрләре”нә яздыруда уңышлы эшләгән почта хезмәткәрләренә редакция истәлекле бүләкләр тапшырачак.