Әлки районында “Балалар террорчылыкка каршы” дигән рәсем конкурсы үткәрелде

Малайлар һәм кызлар “Балалар террорчылыкка каршы” дигән темага төрле рәсемнәр, плакатлар ясаганнар. Бу катлаулы мәсьәләгә шулай итеп үз мөнәсәбәтләрен белдергәннәр. 
 

Бәйгегә нәтиҗәне тантаналы шартларда ясадылар. Лагерьга район башлыгы Александр Никошин үзе килгән иде. Ул ял итүче кызларга һәм малайларга карап болай диде:
– Нәрсә ул террорчылык? Бер төркем коралланган кешеләрнең мәктәп бинасын үз кулларына төшерүе, самолет урлап китүләре, бер гаепсез кешеләрне тоткын итеп алып, үз таләпләрен куюлары терроризм дип атала. Мөгәен, сезгә әти-әниләрегез, тәрбиячеләр бу хакта сөйлидер, террорчылык акты вакытында үзеңне ничек тотарга өйрәтәдер. Андый очракта кешеләрне куркыныч җирдән чыгару мөмкинлеген эзләргә, коткаручыларга хәбәр итәргә кирәк. Беребез дә кемнеңдер шундый хәлгә таруын, Беслан мәктәбендә булган вакыйганың кабатлануын теләми. Террорчылык – явызлык ул. Террорчылар бер гаепсез кешеләрне газаплыйлар, аларның теләге – башкаларны куркыту. Билгеле, безнең иң зур теләгебез – балаларның җәйге ялы тыныч, имин үтсен, сез лагерьда рәхәтләнеп күңел ачыгыз, вакытыгызны файдалы үткәрергә тырышыгыз һәм, смена тәмамлангач, бер-берегездән аерылышасыгыз килмәсен иде.
Аннары Александр Никошин рәсемнәр бәйгесе җиңүчеләренә дипломнар тапшырды. “Балалар терророчылыкка каршы” номинациясендә иң яхшы плакатларны “Бәрәңге”, “Белиберда” һәм “Вип персоналар” отрядлары ясаган икән. Ә “Без бөтен дөньяда тынычлык яклы!” темасына иң матур рәсемнәрне Базарлы Матактан Камилә Зарипова һәм Айсылу Зарипова, Борискинодан Арина Ведяскина ясаган булып чыкты. “Куркынычсыз дөнья” номинациясендә җиңүчеләр урыннарны түбәндәгечә бүлештеләр: Казаннан Камилә Гаязова беренче урында, Базарлы Матактан Луиза Хәсанова һәм Софья Бухарова – икенче, Камила Гнеденкова – өченче урында. “Террорчылык – җәмгыятькә янау ул” темасына ясалган рәсемнәр конкурсында Диләрә Юсупова, Карина Насифуллина һәм Тимур Гыймадиев җиңүче булдылар. Алар барысы да Казаннан. 
Соңыннан балаларга куркынычсызлык кагыйдәләре турында язмалар тараттылар. Әлеге буклетларда хуҗасыз сумкага юлыксаң, өйдә я урамда террорчылык актына дучар ителсәң, газ исе сизгәндә, янгында, су басуда һәм коенганда бата башлаганда нишләргә кирәклеге аңлатылган. 
Фотололар безнең сайтта.