Россия Федерациясе Авыл хуҗалыгы министрлыгында Татарстанның әче туфракларны известьлау һәм авыл хуҗалыгы техникасын техник модернизацияләү буенча алдынгы төбәкләр арасында булуын билгеләделәр
14 гыйнварда авыл хуҗалыгы министрының беренче урынбасары Джамбулат Хатуов төбәк аграр ведомстволары җитәкчеләре, тармак берлекләре һәм фәнни җәмәгатьчелек вәкилләре белән язгы кыр эшләренә әзерлек һәм үзебезнең чәчү материалын куллануга багышланган селектор киңәшмәсе үткәрде. Чарада Татарстан Республикасы Премьер-министры урынбасары — Татарстан Республикасы Авыл хуҗалыгы һәм азык-төлек министры Марат Җәббаров катнашты.
Татарстан Россия Федерациясе Авыл хуҗалыгы министрлыгы җитәкчелеге тарафыннан әче туфракларны известьлау һәм авыл хуҗалыгы техникасын техник модернизацияләү буенча алдынгы төбәкләр арасында билгеләп үтелде. 2019 елда республикада известьлау 57 мең га мәйданда башкарылган. Исегезгә төшерәбез, әче туфраклар-безнең төбәк үзенчәлеге һәм яхшы уңыш алуның төп лимитлаучы факторы. Аларга минераль ашламалар да файда бирми. Иң элек туфракны известьлау зарур. Авыл хуҗалыгы товарлары җитештерүчеләр чыгымнарының 90% ы Татарстан Республикасы Авыл хуҗалыгы һәм азык-төлек министрлыгы тарафыннан кире кайтарыла.
Моннан тыш, республика тарафыннан 2019 елда авыл хуҗалыгы техникасы паркын модернизацияләү буенча шактый эш башкарылды, 242 трактор, 130 ашлык җыю комбайны, 32 азык җыю комбайны һәм 2 меңнән артык башка авыл хуҗалыгы техникасы сатып алынды.
Министрның беренче урынбасары хәбәр иткәнчә, уңдырышлылыкны арттыру, техник модернизацияләү, төп авыл хуҗалыгы культураларын җитештерү күләмнәрен арттыру өчен органик һәм минераль ашламалар кертү белән беррәттән, авыл хуҗалыгы министры Дмитрий Патрушев тарафыннан 2020 ел уңышы өчен чәчү вакытында ил селекциясе орлыклары сортларын яңарту һәм куллану бурычы куелды. Джамбулат Хатуов сүзләренә караганда, Россия фәнни учреждениеләренә үз продуктларын базарда активрак кулланырга кирәк.
«Регионнарга үзебезнең сортларны производствога кертү буенча активрак позиция күрсәтергә кирәк дип саныйм — бу илнең азык — төлек иминлеге гарантиясе", - дип белдерде министрның беренче урынбасары.
Татарстан Республикасы Авыл хуҗалыгы һәм азык-төлек министрлыгы Татарстанда «АгроСемЭксперт» программасы эшләнүен искә төшерә, ул аграрийларга сатып алу өчен орлыкларның кулай партиясен табарга яки аларны китерү буенча үз тәкъдимнәрен урнаштырырга ярдәм итә. Программа шулай ук хуҗалыкларга җентекле анализ үткәрергә, орлыкларның сыйфатын һәм санын күзәтергә мөмкинлек бирә. Системада селекция казанышлары дәүләт реестрына кертелгән үсемлекләрнең куллануга рөхсәт ителгән сортларын тиз эзләү дә бар. Аграрийлар программадан тулысынча бушлай файдалана алалар