Россиядә гыйнвар аеннан коронавирустан прививка ясатучы паспорты бирә башлаячаклар

2020 елның 29 декабре,сишәмбе

Электрон паспортны дәүләт хезмәтләре порталында шәхси кабинетта табарга мөмкин булачак.

Киләсе ел башыннан Covid-19дан прививканы ясатучыларның шәхси кабинетында вакциналаштырылучы паспорты барлыкка киләчәк. Бу хакта ТАСС РФ Сәламәтлек саклау министры Михаил Мурашкога сылтама белән хәбәр итә.

« Без гыйнвар аенда дәүләт хезмәтләре сайтында автомат режимда вакциналаштырылучы паспорты алу мөмкинлеге булыр дип планлаштырабыз», — дип билгеләп үтте Мурашко.

Ул искә төшергәнчә, Covid-19дан вакцина алган пациентлар турында мәгълүмат кертә торган электрон ресурс эшли. Соңгы өч атнада Россия регионнарына 507 мең доза вакцина җибәрде, шул исәптән 5,9 мең доза — Татарстанга.