Базарлы Матакта Лисенков музеенда Яңа Ел открыткалары күргәзмәсе ачылды
2021 елның 9 гыйнваре, шимбә
Базарлы Матак авылында Сергей Лисенков исемендәге тарих-туган якны өйрәнү музеенда узган елгы Яңа ел открыткалары күргәзмәсе ачылды. Аларны массалы рәвештә 1941 елда гына, фронтта кызылармеецларның сугышчан рухын күтәрү өчен бастыра башлаганнар икән. Моңа кадәр СССРда котлау открыткалары буржуаз үткән заманның башыннан санала иде. Бу хакта “Әлки хәбәрләре”ндә язалар.
Биредә шулай ук “Коммунизм юлы” (элек район газетасы шулай дип аталган) газетасының бәйрәм номерлары белән дә танышырга мөмкин. Ул вакытта район газетасы җирле типографиядә басылган. Бер номерның беренче битендә Мәскәү Кремле сурәтләнгән. Текст яшел кара белән язылган.
Сергей Лисенков исемендәге тарих-туган якны өйрәнү музее хезмәткәрләре яңа ел каникулларында кунакларны каршылауга ныклап әзерләнде. Килүчеләр өчен "Яңа ел сәүдәгәрләрчә" театральләштерелгән программасын әзерләделәр, ул, экскурсиядән тыш, әкияти персонажлар катнашындагы тамашаны үз эченә ала. Быел Кыш бабай белән Кар кызы да өр-яңа, бик матур киемннән.
Музейның икенче катында фотозона җиһазландырылган. Һәркем купец креслосында бизәлгән чыршы фонында фотога төшә ала. Сүз уңаеннан, урман гүзәле өчен бизәнү әйберләре җирле музейда эшләүчеләр уздырган мастер-классларга килгән балалар кулы белән ясалган.
Биредә бисер белән бизәлгән Яңа ел шарларын да, тукымадан тегелгән әкияти персонаж сыннарын да, кәгазьдән һәм картоннан искиткеч гирляндаларны да күрергә мөмкин – балалар һәм аларның остазлары бик тырышкан.
Музей хезмәткәрләре район халкына һәм кунакларына борынгы предметларны: совет чоры открыткаларын, фотосурәтләрен, чигелгән сөлгеләрне һәм башка әйберләрне кирәкми дип ташламауларын үтенеп мөрәҗәгать итте.
"Сезнең исемегез Сергей Лисенков исемендәге музей тарихына язылачак, ә иң мөһиме, экспонатларны йөзләгән һәм меңләгән рәхмәтле килүчеләр караячак", - дип билгеләп үтте музей хезмәткәрләре.