Россия педагоглары Казанда белем бирүнең цифрлаштыру проблемалары турында фикер алыштылар
2021 елның 31 гыйнваре, якшәмбе
Казан радиомеханика көллиятендә узган Бөтенроссия фәнни-гамәли конференциясендә катнашучылар мәгарифне цифрлаштыру перспективалары һәм проблемалары турында фикер алыштылар. Бу хакта ТР Мәгариф һәм фән министрлыгының Матбугат хезмәте хәбәр итә.
Фәнни конференция эшендә Татарстан Республикасы, Чуваш Республикасы, Марий Эл Республикасы, Саха (Якутия) Республикасы, Алтай крае, Пермь крае, Мәскәү шәһәре һәм Новосибирск шәһәре һөнәри белем бирү оешмалары, югары уку йортлары һәм һөнәри әзерлек үзәкләре укытучылары, методистлары, педагог-психологлары, социаль педагоглары катнашты.
Конференциядә мәгарифне цифрлаштыру перспективалары һәм проблемалары, «Цифрлы дидактика»ның эчтәлеге, формалары һәм методлары, цифрлы икътисад шартларында белем бирү процессының сыйфаты белән идарә итү турында фикер алыштылар.
Эшкә йомгак ясап, конференциядә катнашучылар куелган мәсьәләләрнең актуальлеген һәм барлык төбәкләрдә дә цифрлы белем бирүнең иң яхшы тәҗрибәләрен тарату һәм куллану кирәклеген билгеләп үттеләр.