Яхшылык белән әйткәнне аңламасалар...

Икеайлык барышын район башкарма комитеты контрольдә тота: җыештырылмаган урамнар видеога төшерелә, җаваплы затлар кисәтелә. Әйтик, үткән атнада Чисталык комиссиясе район үзәгенең кайбер урам-тыкрыкларында җыештырылмаган мәйданнарга, чүплеккә әйләнеп килүче почмакларга тап булганнар. Мәсәлән III Интернационал урамында яшәүчеләрнең күпчелеге чүп чыгару көнендә өйләрендә җыелган барлык чүп-чарны  бер урынга өеп куйганнар. Билгеле, мондый өемнәр һич кенә урамны бизәми һәм әле хуҗасыз этләрне дә "кызыктырып" тора. Нәтиҗәдә, этләр ерткан капчыклардан чүп-чар тирә якка тарала.
Атна саен базар кайнап торган мәйданның тирә-ягы да бик чүпле, ә кәгазь-полиэтилен кисәкләре Энергетиклар урамына чаклы очып барып җиткән. "Кызыл Шәрык-Агро"га караган амбар территориясе кипкән үлән, чүп-чардан арындырылмаган. Ә Базарлы Матакның Каратайка дип аталган очын (Төзүчеләр урамы  белән чиктәш) зур мәйданлы чүплек белән чагыштырырга була. Бу урыннарны бик тиз арада җыештырырга кирәк, билгеле.
Санитар икеайлык барышын район эчке эшләр органнары да тикшереп тора. Чөнки  пычрак яшәүче, әйләнә-тирәне чүпләндерүче гражданин закон боза бит. ТР Административ хокук бозулар кодексына нигезләнеп, полиция хезмәткәрләре андый хуҗаларга (шулай ук вазыйфалы затларга, юридик затларга) карата беркетмә төзеп, штраф салалар. Үткән атнада хокук сакчылары Базарлы Матакта яшәүче Надежда Лазаревага, Раил Гыйниятуллинга, Гүзәл Гайнетдиновага, Рәис Кыямовка, Айрат Гатауллинга, Рәиф Гаязовка, Югары Кәчидән Раиса Толстовага (хуҗалыгындагы дуңгызларны караусыз, иректә йөрткән өчен), Борискинодан Валерий Сидоровка карата шундый чара күргәннәр. Бу кешеләр үзләренең чынлап та әйләнә-тирә мохитне пычратулары (чүп-чарның алар хуҗалыгыннан чыгарылуы) белән килешкәннәр. Кырын эшне ачыклавы кыен булмаган полицейскийларга, чөнки һәр чүп өемендә хуҗасын "сатарлык" берәр дәлил табылмый калмый бит. Икеайлык башланганнан бирле инде 23 кешенең кисәтелүен дә исәпкә алсак, әйткәнне генә аңламаган кайберәүләрне штрафлар ярдәмендә тәртипкә өйрәтеп булыр шәт, дип өмет туа.
Тиздән халкыбызның иң кадерле бәйрәме 9 Май җитә. Тәртипкә китерелмәгән йорт, сарайлар, чүпле күл, елга буйлары, пычрак урамнар бәйрәм тантанасын ямьсезләмәсен өчен әле шактый эш башкарасы бар бит. Шуңа күрә язгы чистарынуда һәркем катнашсын, авылыбызны ямьле итүгә үз өлешен кертсен иде.