Рәхмәт сүзләре йөрәктән агылганда…

Бөек бәйрәм, үзәкләрне өзә, күзләрдән яшь китерә, күңел кылларының иң нечкәләрен  тибрәндерә торган бәйрәм бу. Бик күпләр, гаиләләрен, туган-тумачаларын, хәтта биләүдәге сабый балаларын, оныкларын да ияртеп, кемдер боерыгына түгел, йөрәкләре кушканча мәйданнарга ашыга, бабаларыбыз, якын туганнарыбыз истәлегенә һәйкәл итәгенә салырга дип чәчәкләр алып килә. Ел да кабатлана, әһәмиятен, мәгънәсен һич югалтмый торган бөек бәйрәм, бөтен халык бәйрәме бит ул – 9 Май.
Базарлы Матак үзәгендәге тантаналы митинг парад белән башланып китте. Башта мәйданга район җитәкчеләре, сугыш һәм хезмәт ветераннары, дәрәҗәле кунаклар, оешма-учреждение вәкилләреннән торган зур төркем керде. Аннары автомашиналар колоннасы узды. Беренче машиналарның арбаларында үзешчәннәребез солдатларны сугышка озатуны, тыл хезмәтчәннәре торышын, җиңү шатлыгын чагылдырган күренешләрне сәхнәләштергәннәр, бик тәэсирле булды бу. Аннары нык адымнар белән басып, сугышчы-интернационалистлар, эчке эшләр һәм гадәттән тыш хәлләр министрлыклары хезмәткәрләре, үзәк хастаханә коллективы, мәктәп укучылары, хәрби-патриотик клублар әгъзалары үз урыннарын алдылар.
Тантаналы митингны ике телдә бик тәэсирле итеп Татьяна Петухова һәм Ринас Шиһапов алып бардылар. Алар китергән берничә санны язып үтәсе килә. 1418 көнгә сузылган Бөек Ватан сугышында 27 миллион совет кешесенең гомере өзелгән, ягъни һәр көн саен 14 мең, һәр сәгатьтә 600, һәр минут саен 10 кеше һәлак булган.
–Аларны онытырга хакыбыз юк!–Бу сүзләр митингның асылын ачып салды.
Әлкилеләр белән бергәләп бәйрәм итү өчен башкалабыздан кунаклар килгән иде. Алар арасында территорияләр эшләре буенча идарәнең баш киңәшчесе Айрат Малюков, ришвәтчелеккә каршы көрәштә ярдәм күрсәтү комитеты рәисе Петр Сысоев, Казан университеты профессоры Альберт Борһанов һәм башкалар бар иде.
Митингта катнашучыларны бәйрәм белән район башлыгы Фердинат Дәүләтшин котлады.
–Бу якты бәйрәм һәрберебезнең йөрәгендә. Бөек Җиңүгә халкыбыз бик авыр сынаулар аша иреште. Бүгенге матур тормышыбыз хакына һәлак булган якташларыбызны бер минут тынлык белән искә алыйк,– диде ул.
Митингта катнашучыларны район хәрби комиссары Виктор Лаврентьев, сугыш һәм хезмәт ветераннары оешмалары район советы рәисе Фаиз Шакиров, Базарлы Матак мәктәбе укучысы Энҗе Гаязова, район мөхтәсибе Ислам Шәйхетдинов, протоиерей Андрей Зиньков котлады. Ә меценат Геннадий Волостнов бертөркем әлкилеләргә бүләкләр тапшырды.
Шуннан соң Азат итүче солдат һәйкәле итәгенә чәчәкләр, гирлянда һәм веноклар салынды, аяз зәңгәр күккә төрле төстәге шарлар очты, Җиңү көне хөрмәтенә салют атылды.
Тантаналы митингтан соң бәйрәм зур концерт белән дәвам итте. Зәңгәр күктән юмарт яз кояшы җылы нурларын сибеп, бәйрәмне аеруча күңелле, матур, якты итте бу көнне.