Тел ачкычлары, ак юллар сезгә!

Инде дәресләрдән, мәсьәләләр чишүдән, инша язудан туеп беткән балаларның шатлыгы чиксез – алда өч айга сузылган ял, кызыклы уеннар, сәяхәтләр. Әмма тугызынчыларны һәм унберенчеләрне әле җитди сынаулар – бердәм дәүләт имтиханнары, дәүләт йомгаклау аттестациясе – көтә. Нәби Дәүли исемендәге Базарлы Матак гимназиясенең 9 сыйныфын бу уку елында 25 укучы тәмамлый, 11 сыйныфны бетерүчеләр – 20.
Чыгарылыш сыйныфлар укучыларын соңгы кыңгырау тантанасында бөтен гимназия алкышлады. Коңгырт төстәге күлмәкләр, ап-ак алъяпкычлар кигән кызлар, килешле матур костюмнарга киенгән егетләр бүген аеруча күркәмнәр, чибәрләр иде. Ә бит шушы гимназия бусагасын атлап керүләренә әле кайчан гына кебек. Тугыз ел, унбер ел вакыт сизелми дә үтеп киткән. Инде менә  алар өчен соңгы мәртәбә мәктәп кыңгыравы шылтырый, соңгы тапкыр мәктәп линейкасына чыгулары. Тизрәк зур үсәселәре, укуны тәмамлап мөстәкыйль тормышка аяк басасылары килә дә, гимназия, укытучылар белән саубуллашу бигрәк ямансу икән. Алда торган зур, яңа тормыш ымсындырып чакыра да, әзрәк шүрләтә дә. Бераз читтәрәк әнә әти-әниләре, ничәмә-ничә еллар белем-тәрбия биргән укытучылары горурланып та, сөенеп тә күзәтә аларны. Кайсылары күз яшьләрен дә сөртеп куя.
Рәхмәт сезгә, хөрмәтле укытучылар, куйган хезмәтегез, түккән көчегез, биргән күңел җылыгыз өчен – чыгарылыш сыйныфлар укучылары мөгаллимнәренә әнә шул ихлас хисләрен җиткерделәр.
Укытучыларны, укучыларны, ата-аналарны бәйрәм белән район мәгариф идарәсе җитәкчесе урынбасары Нурания Заһидуллина котлады. Ул  егет-кызларның чыгарылыш имтиханнарын уңышлы тапшыруларын, бу тормышта үз юлларын табуларын теләде.
Гимназия директоры Фәридә Яруллина да  укучыларына җылы теләкләр әйтте һәм  спорт белән актив шөгыльләнгән, район, республика ярышларында призлы урыннар яулаганнарга, гимназия тормышында активлык күрсәткәннәргә Мактау грамоталары тапшырды. Нурания Хәбибулловна укуда югары уңышларга ирешкәннәрне бүләкләде. Физкультура укытучылары Олег Астафьевка, Руслан Советниковка яшьләр эшләре һәм  спорт бүлеге начальнигы  Раил Гатауллин Рәхмәт  хатлары  тапшырды.
Ел әйләнәсе гимназия тормышында актив катнашкан 11 сыйныф укучылары Раил Сафиуллин һәм Ландыш Гайнетдинова иң яхшы гимназист һәм лидер дип табылдылар. Җәмәгать эшләрендә һәм спортта иң актив сыйныфлар да бүләкләргә лаек булды.
Укучылар тарафыннан әзерләнгән концерт бәйрәмне  тагын да  ямьләндереп җибәрде.
Бу көнне чыгарылыш сыйныфлар укучыларына бик күп матур теләкләр юлланды. Бәйрәмнең икенче өлеше гимназиянең актлар залында дәвам итте, дулкынландыргыч, тәэсирле кичә булды ул.
Инде егет-кызларга имтиханнарда тел ачкычлары, уңышлар, ак юллар гына телисе кала.