Әкият чынга ашсын өчен...

Узган җомгада Хәйруллин фонды ярдәме белән, бөтен Татарстаннан җыелган күп балалы гаиләләрдә тәрбияләнүче, ятим һәм физик мөмкинлекләре чикләнгән балалар "Әкият" курчак театрында "Цветик-семицветик" дигән спектакль карады. Соңгы 5 елда балалар өчен мондый бәйрәмнәр оештыру күркәм гадәткә әверелде. Ә сабыйларның бәхетле елмаюлары – иң яхшы рәхмәт сүзе һәм яңа уйларны тормышка ашыру өчен менә дигән этәргеч!
Менә 31 май көнне дә нәни кунакларны, аларның әти-әниләрен һәм педагогларны театр фойесында шарлар һәм әкияти геройлар каршы алды. Игътибар һәм кыйммәтле уенчыкларны бөтенләй диярлек күрмәгән балаларның күзләре соклану һәм бәхет хисләреннән балкыды. Ә яшь тамашачылар караган матур һәм мәрхәмәтле әкият спектакльдән соң да дәвам итте. Хәйруллинның хәйрия фонды һәр балага татлы бүләкләр тапшырды.
– Минем биш балам бар, – ди Казаннан килгән 50 яшьлек Валентина Макеева. – Икесе зур инде, кечеләрен дә курчак театрына бик сирәк алып барам. Билет бәясе балалар өчен дә, өлкәннәргә дә өч йөз сум тәшкил итә. Барыбызга бергә мең ике йөз сум түләргә туры килә. Бу безнең өчен бик зур акча. Бүген баз тагын бүләкләр дә алдык. Безнең өчен мондый бәйрәмне оештырган кешеләргә Ходай бәхет һәм сәламәтлек бирсен!
Валентина үзенең игезәк балалары Косьма белән Дамианга изгеләр көнендә туганга шундый исемнәр биргән. Ә кече улы Алеша өч елдан соң дөньяга килгән. Алар барысы да яңа сафка баскан "Әкият" курчак театрына тәүге тапкыр килгән.
–Миңа күбесенчә чит планетадан килгән кешеләр ошады!–дип бер-берсен бүлдерә-бүлдерә сөйли игезәкләр.
–Юк ла, иң матуры – бака! – дип бүлдерә аларны энеләре. – Ул бик кызык.
–Без мондый бәйрәмнән соң өйгә кайтып утыру кызык булмас дип уйладык, – ди елмаеп бәхетле ана. – Хәзер без Бауман урамында йөрергә ниятлибез, туңдырма ашарбыз, фотога төшәрбез...  Хәйруллинның хәйрия фондына яхшы кәеф бүләк иткәне өчен мең рәхмәт!
Лиля Полушкина "Әкият" курчак театрына улы Романы алып килгән. Малай – инвалид, ул Хәйруллинның хәйрия фонды оештырган акциягә чакыруны "Апрель" тернәкләндерү үзәге аша алган.
– Улым таң калды! – дип хис-кичерешләре белән уртаклаша Лиля. – Ишек янында Шрекны, куян баласын күргәч, шунда ук елмаеп җибәрде! Без кесә телефонын фотосурәтләр белән тутырдык. Өйгә кайткач, барысына да мактаначакбыз. Ә аннары фотоларын ясатып, матур кысаларга куеп, туганнарга бүләк итәчәкбез.
Альбина Давыдованың сигез яшьлек кызы Анастасия дә физик мөмкинлекләре чикләнгән бала. Әмма бу көнне ул изге күңелле кешеләр ярдәмендә һәркемнең әкият дөньясы белән таныша алуына ышанган.
–Миңа бигрәк тә Женя исемле кыз ошады, – дип спектакльдән алган хис-кичерешләре белән уртаклаша сабый. –Ул бик мәрхәмәтле һәм матур. Минем дә аның кебек буласым килә.
– Без "Здравушка" дигән тернәкләндерү үзәгенә йөрибез һәм безгә анда курчак театрындагы спектакльләрне бушлай карый алачаксыз дип әйттеләр, – ди Альбина. – Без биредә әле беренче тапкыр. Яңа ел алдыннан театрга барырга теләгән идек, әмма билетларны кулга төшерә алмадык. Менә хәзер безгә дә бәхет елмайды. Хәйруллинның хәйри фондына зур рәхмәтебезне белдерәбез!