Фәнил Минһаҗев быел да Сабантуй батыры булды

 Шундый көрәшчеләр катнашкан алышны күзәтү үзе бер кызык. Өстәвенә, келәмдәге судьялар арасында республиканың татарча көрәш федерациясеннән чакырылган хөкемдар Рифкать Шәрифуллин да бар. Шуңадыр да көрәш беркемдә дә шик уятмаслык итеп, кагыйдәләрне төгәл үтәп алып барылды.
Мәйданда көрәшчеләребез берьюлы ике келәмдә көч сынашты. Көрәшчеләр саны да аз түгел – 140 ка якын төрле яшьтәге һәм үлчәмдәге көрәшчеләр катнашты Сабантуй бәйгесендә. Бүләкләре дә кыйммәтле, затлы иде шул – зур телевизорлар, суыткычлар һ.б. Ә көрәш батырына төп бүләк – тәкә. Ул мәйдан эченә үк кертеп бәйләнгән һәм хуҗасын көтә.
Менә  келәмнәрдә көрәш башланып китте. Күренеп тора, көрәшчеләр алышка зур әзерлек белән килгәннәр. Әле кайчандыр үзе өйрәткән шәкертләре белән Илдар Әхмәров та көч сынаша. Халык  келәмнәрдә барган алыштан күзен алмый, көрәшчеләргә көч биреп, хуплап, дәртләндереп тора. Вакыт-вакыт дәррәү урыннарыннан ук сикереп торалар. Көрәшнең нинди авыр спорт төре икәнлеге һәркемгә мәгълүм. Шулай да, шөкер, тән җәрәхәтләре алучылар булмады. Бәйгедә, әлкилеләрдән тыш, республикабызның төрле төбәкләреннән – Әлмәттән, Актаныштан, Казаннан, Яр Чаллыдан, Түбән Камадан, Сабадан, Буадан – килгән көрәшчеләр катнашты. Көрәш бәйгесе  15 үлчәм категориясенә бүленде, 45 урын билгеләнде.
Мәгълүм булганча, көрәш 7 июньдә кичке Сабантуйда ук башланды. Анда балалар, үсмерләр бил алышып, үз араларыннан финалга чыгучыларны ачыкладылар. Иң көчле яшьләр инде төп Сабантуйда призлы урыннар өчен көрәште. Балалар һәм яшүсмерләр арасында милли көрәшнең абсолют чемпионы исемен Каргадан Айрат Фәттахов (ул 70 килограммга кадәр авырлык үлчәмендә көрәште) яулады.  Быел 8 сыйныфны тәмамлаучы Айратның шундый зур уңышка ирешүендә аның әтисе һәм тренеры Илгизәр Фәттаховның да өлеше зур. Икенче урынны Иске Салманнан Радик Ибәтуллин, өченче урынны  Ташбилгедән Фаил Гатауллин алды. Аларның тренеры Рәмис Вафин.
Әлки Сабан туеның абсолют батыры булып Фәнил Минһаҗев калды. Инде ничәнче ел рәттән районыбыз Сабан туе батыры дигән дәрәҗәле исемне яулый Фәнил. Ул Югары Әлкидә туып-үскән, хәзер Әлмәт шәһәрендә нефть чыгаруда хезмәт куя. Спортта зур җиңүләргә ирешкән шәхес – Татарстанның милли көрәш буенча атказанган спорт мастеры, 2005 елда путалы көрәш буенча дөнья чемпионатының бронза призеры. Көчле алкышлар астында Фәнил җилкәсенә дәү тәкәне салып мәйдан әйләнде.