Иң мөһиме – белемле, әйбәт кадрлар

Боларның барысын да безнең район масштабына күчереп әйтеп була. Бүген әлкилеләрнең сәламәтлеге сагында 320 дән артык медицина хезмәткәре тора, аларның 38е –табиблар. Сменага 185 кеше кабул итәрлек район поликлиникасы, тәүлеклек стационар шартларында эшләүче 30 койко-урынлык 2 хастаханә, 3 табиблык амбулаториясе, 41 фельдшер-акушерлык пункты һәм 4 бригадалы ашыгыч медицина ярдәме бүлекчәсе – районның сәламәтлек саклау системасының структурасы әнә шундый.
Замана медицинасы зур адымнар белән алга бара, ул фәнни яктан яңа дәвалау алымнары белән баетыла, авыруларны диагностикалау, дәвалауга  хезмәт итүче өр-яңа катлаулы җиһазлар уйлап табыла һәм куллануга кертелә. Бу җәһәттән шуны әйтәсем килә: медицина системасын модернизацияләү, матди базасын ныгыту һәм үстерү республика һәм район җитәкчеләренең һәрдаим игътибар үзәгендә. Берничә генә мисал китереп үтәм. Соңгы вакытларда  гына да хастаханәләргә 2,3 млн сумлык һәртөрле җиһаз, шул исәптән диагностика комплексы, үпкәләрне ясалма вентиляцияләү аппараты, баш миен һәм аның тамырларын тикшерү өчен аппарат, портатив ультратавышлы сканер, күчмә рентген аппараты, биохимик анализатор һәм башкалар алынды. Болар барысы да авыруны башлангыч чорында ук ачыклау, дөрес дәвалау методикасы сайлау мөмкинлеге бирә.
Билгеле инде, нинди генә заманча, катлаулы җиһазлар булмасын, төп көч –белемле, акыллы, игътибарлы табибларыбыз һәм шәфкать туташлары. Бу юнәлештә дә телгә алып әйтерлек күрсәткечләребез бар. Әле ничә ел элек кенә табиблар бик нык җитешми иде безгә. Соңгы 3 елда районга 11 табиб килде! Табибларны авылда эшләүгә җәлеп итүдә торакка социаль наем республика программасы, медицина хезмәткәрләренә бер мәртәбә зур күләмле компенсация түләү турындагы федераль программа да нык ярдәм итте.
Сәламәтлек – иң зур байлыгыбыз. Аны саклау, кайгырту, үз вакытында табибка күренеп, әлегәчә сиздермәгән авыруларны ачыклау һәм тизрәк дәвалау да бик мөһим. Шуңа күрә гражданнарны диспансерлаштыруга зур  әһәмият тә, средстволар да бүлеп бирелә. Мәсәлән, эшләүче гражданнарны, сугыш ветераннарын, 14 яшьлек үсмерләрне, гражданнарның башка категорияләрен йөрәк-кан тамырлары, онкологик авыруларны һәм башкаларын башланып кына килгәндә ачыклау мөмкинлеге бирде. Шулай итеп, күпме әлкиленең сәламәтлеген ныгыту, хәтта ки гомерен саклап калу мөмкин булды. Быел да бу эш дәвам итә, әмма масштаблары тагын да киңрәк – районның калган халкына да тикшерү үтү мөмкинлеге бирелде.
Район сәламәтлек саклау системасы заманча үзгәреш кичерә. Мәсәлән, ашыгыч ярдәм сорап шылтыратучыларның мөрәҗәгатьләрен кабул итү өчен "Незабудка" системасы урнаштырылды, безнең табиблар Татарстанның фаҗигаләр медицинасы белән даими элемтәдә торып эшлиләр, кирәк икән, диагноз кую, дәвалау алымнарын сайлау алдыннан башкала табиблары белән киңәшләшәләр. Яңа кабул итү-диагностика бүлеге эшли, авылларда фельдшер-акушерлык пунктлары төзекләндерелә, модульле, тиешенчә җиһазландырылган пунктлар урнаштырыла.
Медицина хезмәткәрләрнең белемен күтәрү, тәҗрибәсен үстерү дә игътибар үзәгендә. Табиблар, шәфкать туташлары даими укыйлар, осталыкларын арттыралар, өстәмә күнекмәләр үзләштерәләр. Болар барысы да район халкының сәламәтлеген кайгырту максатыннан эшләнә.
Бу атнада медицина хезмәткәрләре һөнәри бәйрәмнәрен билгеләп үтәләр. Безнең өчен бик тә кадерле бәйрәм бу. Табиб хезмәтенең ни дәрәҗәдә катлаулы, авыр, җаваплы икәнлеген алар үзләре генә белә. Ак халатлы хезмәткәрләребез еш кына кеше гомере өчен көрәшәләр, аның киләчәген, язмышын үз кулларында тоталар. Һөнәри бәйрәмебез – табиблар, медицинага кагылышы булган һәркемнең хезмәтенә бәя бирү өчен, рәхмәт әйтү өчен менә дигән форсат. Бәйрәмебез белән, коллегалар! Кешелекле, бик тә кирәкле хезмәтегез өчен, тырышлыгыгыз, фидакарьлегегез өчен рәхмәт.