Очраштырды, ял иттерде, көч-дәрт бирде бу бәйрәм

Теләсә нинди тантана һәм бәйрәмнең ничек үтүе аны алып баручыларга да бик бәйле, билгеле. Карга Сабан туен Габдулла Кариев исемендәге театр артисты Рафил Галимуллин алып барды. Үзе әле 24 яшьтә генә булса да, "Тантана" театраль премиясе лауреаты Рафилнең осталыгы бәхәссез. Ә янәшәсендә Югары Әлки авылыннан татар теле укытучысы Айзирәк Мисалова. Алар бәйрәмгә килүчеләрне кич буе җырлаттылар да, биеттеләр дә, үзләренең сәхнә осталыкларын да күрсәттеләр.
Каргадан Люция һәм Ләйсән Зиннәтуллиналар, Казаннан "Азалия-Зиннәт" төркеме, Азат һәм Алинә Кәримовлар, "Ләззәт" дуэты – һәркайсы үз чыгышлары белән бәйрәмне ямьләндереп, күңелләрне җилкендереп тордылар.
Бәйрәмнең башланып китүе дә бик матур булды. Менә Сабан туе мәйданына гармуннар сызгыртып, тарантасларына бала-чагалар төяп, сөлгеләр, кулъяулыклар белән бизәлгән җигүле атлар килеп керде. Элеккеге традицияләргә тугры калып, биредә ел да Сабан туе алдыннан гармуннар белән авыл әйләнәләр, йорттан-йортка кереп сөлгеләр, чигүле тастымаллар җыялар икән. Әнәс Кәримов, Габделхак Сәгъдиев, Госман Шәйхетдинов, Нурхәммәт Низамов, Ленар Яруллин бу гореф-гадәтне бик оста итеп, җиренә җиткереп башкаралар.
Сабан туен котлау сүзләре белән Карга авыл җирлеге башлыгы Рамил Минһаҗев ачып җибәрде. Ул авылдашларын, кайткан кунакларны хөрмәтләп сәламләде. Бәйрәмне оештыруга зур өлеш керткән авылдашлары Фоат Вәлиевка зур ихтирам белән рәхмәтен белдерде. Кануннарына туры китереп, сәхнәдән авылның имам-хатыйбы Ирек хәзрәт Коръән сурәләрен укыды, Сабан туена фатиха бирде.
Бәйрәмнең дәрәҗәле кунаклары – район башлыгы Фердинат Дәүләтшин, Татарстан Дәүләт Советы депутаты, "Алексеевскдорстрой" ААҖ җитәкчесе Фоат Вәлиев, Спас районы башлыгы Камил Нугаев сүз алып, һәркемгә исәнлек-саулык, рәхәтләнеп ял итәргә, вакытны күңелле итеп үткәрергә теләкләр теләделәр.
Спас районы башлыгы Камил Нугаев каргалыларга истәлек итеп сәгать бүләк итте. Аны җирлек башлыгы Рамил Минһаҗев рәхмәт сүзләре белән кабул итеп алды.
Шул арада "Атлар кайта!" дигән тавыш яңгырады. Чабыштан кайтучы атларны мәйдан аягүрә басып, көчле алкышлар белән каршылады. Күрше Алексеевск районының Языково авылыннан Александр Сухов үзенең юртагы белән бу бәйгедә беренчелекне яулады. Берсеннән-берсе матур, төз атлары белән Айдар Нотфуллин, Мансур Гатин, Фиргать Гәрәев та мәйданны урап уздылар.
Аннан мәйданда авылның уңган, мактаулы кешеләрен бүләкләү башланды. Бишәр бала табып үстерүче Гөлсинә Гатина, Гүзәл Хәсәнҗанова алкышлар астында бүләкләр алдылар. Авылның иң өлкән кешеләре 92 яшьлек Миңсылу Сафина, 90 яшьлек Хәдичә Хөсәенова, 85 яшьләре тулган Разия Нотфуллина һәм Мингалләм Хәбибуллинга да бүләкләр аталды, алар хакында җылы сүзләр әйтелде. 30 ел бергә иңгә-иң куеп гомер итүчеләр Рафик һәм Мәдинә Хөсәеновлар, Мәхмүт һәм Румия Фатыйховлар, 45 ел дус-тату яшәүче Әнвәр һәм Мәдинә Кәримовлар, Фоат һәм Сөембикә Нотфуллиннар, 50 ел бер җан булып гомер кичерүче Зәет һәм Лена Вәгыйзовлар мәйдан түрендә хөрмәтләнде. Быел лаеклы ялга китүче Тәнзилә Яруллина, Гөлсирә Зәйдуллина, Әлфия Нотфуллина, Әмирхан Әпсәләмов, Марс Шәйхетдинов та игътибарсыз калмады. Үткән ел 60-80 яшьлек юбилярларга бик бай булган, алар 16 кеше һәммәсе дә бүләкләнделәр.
Менә соңгы елда гына никахлашкан яшь гаиләләр түргә чакырылды. Биредә бер ел эчендә  9 пар гаилә корган. Әлеге яшь гаиләләрнең өчесе Каргада төпләнгән. Ә Фәргать һәм Гөлнара Шәйхетдиновлар, Радик һәм Рамилә Гыйнановлар, шулай ук Рузалия Гайфуллина яңа матур өйләр салып кергәннәр.
Мәйданга авыл мәктәбенең иң яхшы укучылары Энҗе Гатина, Фәнил Галиуллин, спортчы егетләр, шулай ук туган көннәрен билгеләп үтүче Айгөл Туктамышева, Равил Шәһитов, Зәет Вәгыйзов та чакырылды. "Яңа туган балалар" номинациясендә барлыгы 15 кеше бүләкләнде, алкышлар аша мәйдан аларга үз рәхмәтен җиткерде. Гомумән, Карга авылының киләчәге өчен борчыласы юк, биредә халык саны артып тора. Бер елда әнә күпме бала туган. Бу бик тә сөендерә.
Бәйрәм Сабан туе мәйданында гөрләп дәвам итте. Олысы-кечесе чүлмәк ватты, кемдер капчык белән сугышты, кемдер көянтә-чиләк белән су ташыды, аркан тартышты, капчык киеп узышты. Колга башына күз ачып йомганчы үрмәләп менеп, Алпар егетләре абыйлы-энеле Илнар һәм Илфат Сәйфуллиннар читлектәге әтәчне мәйданга очырдылар. Йомырка куелган кашык кабып йөгерү дә, катыктан тәңкә эзләү дә булды. Көрәштә иң көчле егетләр бил алышты. Шул авылның яшь егете Айрат Фәттахов җилкәсенә тәкә салып мәйдан әйләнде – абсолют батыр исеменә лаек булды.
Бик күңелле булды Карга Сабан туе. Шундый бәйрәмне оештыруда авыл җирлеге советының, бюджет сферасында  эшләүчеләрнең тырышлыгы зур булды. Ә Фоат Вәлиевка Сабан туен үткәрүдә матди ярдәм күрсәткәне өчен бигрәк тә зур рәхмәтләр әйттеләр.