Җәйге Уеннарга старт бирелде

Аннары трибуналарны тутырып утыручы тамашачылар Универсиадага килгән командаларны каршы алдылар. Студентлар уеннарына 10,5 мең спортчы җыелды. Кайбер илләрдән 1-2 кеше килсә, Россия Федерациясе, Америка Кушма Штатлары командаларында йөзләгән спортчы бар.
Бөтендөнья Җәйге Уеннарны Россия Президенты Владимир Путин ачык дип белдерде. Ул моны ике телдә – русча һәм татарча әйтте: "Кунакчыл Россия исеменнән сезне Казанда, Бөтендөнья Җәйге Универсиадада сәламлыйм. Исәнмесез. Универсиаданы ачык дип белдерәм! Дуслар, сез төрле илләр һәм континентлар вәкилләре, әмма бу июль көннәрендә сезне масштабы белән Олимпия уеннарына тиң Универсиада берләштерә!"–диде Президент.
45 мең кеше сыйдырырлык стадионда буш урыннар юк. Казан-Арена Россиядәге шундый иң зур корылмаларның берсе. Аның түренә куелган кәсәдә Универсиада уты яна. 104 мең километр үтеп Казанга килгән утны берьюлы 4 яктан Наил Якупов, Олимпия уеннары чемпионы Екатерина Гамова, Паралимпия уеннарында дүрт тапкыр чемпион исеме яулаган Ирек Зарипов һәм Лондонда Олимпия чемпионы булган Таһир Хәйбуллаев кабыза.
Универсиаданы ачу тантанасы аны тамаша кылган һәркемне таң калдырды. Инде башкалабызда спорт уеннары көннән-көн кыза бара. Үз спортчыларыбызга җиңүләр телик. Ә кунаклар Татарстан, Казан турында бары әйбәт тәэсирләр генә тупласын иде.