Бердәм халык эшли дә, ял да итә белә

Югары Әлморза халкы да зур бәйрәм үткәреп алды. Җәйнең ямьле, кояшлы бер көне иде, матур итеп киенгән, йөзләрендә сөенечле елмаю балкыган авыл халкы мәктәп каршындагы иркен мәйданга җыелды. Сүзне башлап авыл мулласы Вәгыйзь Нәҗип улына бирделәр. Ул Коръән сүрәләре укыганда һәркем тын да алмый тыңлап торды.
Аннары үзебезчә – татарча киенгән кызлар бәйрәм кунакларын татлы чәк-чәк белән сыйладылар, читтән килгән-кайтканнарны да авыз иттерделәр.
Бу урында бераз артка чигенеп, шуны әйтеп үтәсе килә. Югары Әлморзаның авыл бәйрәме чын Сабантуйдай киң булып, зур булып үтте. Аңа бер көн кала авыл яшьләре җигүле атларда урам әйләнделәр, җырлап, такмак әйтеп, һәр йортка керделәр, борынгы гадәтне искә төшереп, бүләк җыйдылар. Кемдер чиккән сөлге, аллы-гөлле яулык бирде, кемдер күлмәклек материал, ашъяулык чыгарды... Бүләк җыючыларга ияргән малай-шалай да өлешсез калмады – аларны хуҗабикәләр конфеттыр, сагыздыр ише тәм-том белән сыйладылар. Менә шулай итеп, бәйрәм кәефе әлморзалылар күңеленә бер көн алдан ук кереп оялаган иде.
Инде авыл көненә әйләнеп кайтыйк. Җирлек башлыгы вазыйфаларын башкаручы Фәнүзә Нотфуллина  бәйрәмгә килүчеләрне тәбрикләп, күңелле ял теләде. Аңа Татарстан Дәүләт Советы депутаты Фәрит Мифтахов, муниципаль район советы аппараты җитәкчесе Фәнис Камалов кушылды.
Нинди бәйрәм җырсыз булсын ди! Әлморзалылар Нияз Җәләлов, "От Афгана до Чечни" төркеме, район мәдәният йорты артистлары чыгышларын яратып карадылар.
Биредә авыл бәйрәме 2009 елдан бирле үткәрелә икән. Аның инде үз традицияләре дә бар. Шул исәптән тырыш хезмәте, матур гаиләсе, уңганлык белән дан тоткан, олы яшькә җиткән, игелекле гамәл кылган авылдашларны билгеләп үтү. Бу юлы да бозылмады матур гадәт: авылның иң кечкенә кешесе – нәни  Рәнис, иң өлкәне – Разия апа Сәйдәтшина, иң зур гаилә башлыгы Минзакир Минсафин, солдат хезмәтен үтәп кайткан Рифат Сафиуллов, балаларга матди ярдәм күрсәткән Каюм Исмәгыйлев, туган көнен билгеләп үтүче Мәдинә Сәгетдинова, авылны төзекләндерүгә зур өлеш керткән Булат Сәйдәтшин, Сәлих Минсафин, Марс Нотфуллин, авылның иң матур йорты хуҗасы Мәннап Нотфуллин авылдашлары каршына чыгып бүләк алдылар, мактау һәм рәхмәт сүзләре ишеттеләр.
Билгеле, хәзер бәйрәмнәр уздыру зур чыгымнар сорый, алар бюджетта каралмаган, димәк, һаман кемнеңдер ярдәм итүенә өметләнергә кала. Югары Әлморза көнен үткәрү чыгымнарын Исмәгыйлев Рамил (Себердә яши һәм эшли), Төхвәтуллин Рияз, Исмәгыйлев Надир, Ганиуллин Рәфис күтәрешкән. Аларга һәркем рәхмәт әйтте.
Шуннан соң чып-чын Сабантуй башланды: атлар чабышы (җиңүче – шушы авыл егете Рәис Төхвәтуллин), көрәш (шулай ук үз батырлары Артур Галимов) тамашачыларның күңелен күтәрде. Төрле уеннар да күпләп оештырылды – бәйрәмгә килүчеләр велосипедта узыштылар, гер күтәрделәр, йөгерделәр, ядрә аттылар, чүлмәк ваттылар... Кыскасы, бәйрәм, күп төсмерле күңелле вакыйга булып, әлморзалыларга һәм кунакларга дәрт, көч бирде. Үзләренең бердәм икәнлекләрен, эшли дә, ял да итә белүләрен, бер-берсенә туганнарча, дусларча мөнәсәбәтләрен кабат раслады бу авыл халкы.