Газизебез арабыздан китте

Тыныч тормышта дәү әтиебез гомере буе намуслы хезмәттә булды. Юхмачы машина-трактор станциясендә, "Заветы Ильича" колхозында, урман хуҗалыгында ревизор, бухгалтер булып эшләде. Ул гадел, тырыш, тыйнак, кешеләргә хәерһахлы иде, һәркем белән әйбәт мөгамәләдә булды. Бабабыз гаиләсе, якыннары турында гел кайгыртып яшәде, балалары, оныклары, оныкчыклары өчен җаны фида иде. Без дә аны өзелеп яраттык, бик хөрмәт иттек.
Катлаулы тормыш юлы узган, кешеләргә гел игелекле мөнәсәбәттә булган дәү әтиебезне  авылдашлар да олылый, ихтирам итә иде. Аны соңгы юлга озатырга  бөтен авыл килде. Читтән кайтучылар да байтак иде. Бабабызның дусларының оныкларына кадәр, бар эш-мәшәкатьләрен янга куеп, аны җирләшергә кайттылар. Безнең бу олы кайгыбызны уртаклашкан, рухи һәм матди ярдәм күрсәткән һәркемгә – район ветераннар советына, Юхмачы авыл җирлеге советына, Юхмачы урта мәктәбе коллективына, барлык авылдашларга, дусларга ихлас рәхмәтебезне җиткерәбез. Һәммәгез сау-сәламәт, кайгы-хәсрәт күрми яшәгез.