Чит-ят кайгы булмый

Айрат Хәйруллин шунда ук әлеге урынга килеп җитә, янгын сүндерүчеләрне чакыра. Ул үзе дә утны сүндерүдә катнаша. "Восток Зернопродукт" ЯАҖ начальнигы Рәис Гайфуллин янгынны сүндерү эшләре белән кырның бер ягында, ә Айрат Хәйруллин икенче ягында җитәкчелек итәләр. Авыл җирлеге советы, фермерлар һәм авыл халкының уртак тырышлыгы белән янгын 30 минут дигәндә сүндерелә дә.
Бу янгынны сүндерү – халыкның бердәмлеге һәм тупланганлыгының чын үрнәге. Беркем дә янда калмый. Утны сүндерүдә һәркем: авыл хуҗалыгы идарәсе җитәкчеләре дә, урынбасарлары да, күрше районнар фермерлары да, Иске Камка авылы халкы да  катнаша. Авыл җирлеге советы хезмәткәрләре янгын сүндерүчеләрне басуга озата киләләр. Күрше авыллардан урып-җыю техникасы килеп җитә, алар басуларны сөреп "кызыл әтәч"нең юлын чиклиләр. Ике янгын сүндерү машинасы, шулай ук Базарлы Матактан килгән ике су сиптерү машинасы утка каршы көрәшәләр.
Рәис Гайфуллин Айрат Хәйруллинның әлеге хәлгә бик нык борчылуын,  гадәттән тыш хәлнең сәбәбе белән кызыксынуын әйтә:
– Миңа бик уңайсыз булды, гафу үтендем: "Ямьсез килеп чыкты…", – дидем. Ә Айрат Нәҗипович болай җавап бирде: "Кешеләр басып карап торса, ямьсез булыр иде, ә сез барыгыз бергә янгынны сүндерергә тырыштыгыз. Авылда халык бердәм шул. Шәһәрдә алай түгел". Ул кешеләрнең янгын вакытында шулай берләшә алуына, беркемнең дә чит бәлагә битараф калмавына гаҗәпләнү катыш сөенүен әйтте.
Янгын 65 гектарда уңышны юк итә, белгечләр бәяләве буенча,  3 миллион сумлык зыян килә. Калган 335 гектарда уҗым бодае коткарып калына – бу 9 миллион сум тирәсе. Бәхеткә, зыян күрүчеләр, һәлак булучылар юк. Хәзер  уттан йолып калынган басуда бодай уңышын җыю дәвам итә.