Бәлага тарыганнарга булышыйк

Соңгы мәгълүматлар буенча инде 800 дән артык йорт су астында, димәк, шулкадәр гаилә тораксыз калган, вакытлыча яшәп тору пунктларында бернинди уңайлыклар булмаган шартларда көн күрергә мәҗбүр. Әлеге районнарда тормыш шулкадәр авыр, телевизион сюжетлар караганда өйсез-йортсыз калган халыкны кызганудан йөрәк әрни. Моңарчы күрелмәгән су басудан Амур өлкәсе бик зур зыян күрде. Амур өлкәсенең хатын-кызлар-берлеге "Татарстан хатын-кызлары" төбәк иҗтимагый оешмасы адресына үтенеч-мөрәҗәгать җибәргән. Әлеге хатта мондый сүзләр бар: " Бәлага тарган кешеләргә хәлдән килгәнчә ярдәм итүегезне сорыйбыз. Олылар да, балалар да җылы өске киемнәргә, урын-җир әйберләренә, азык-төлеккә (яшелчәләр, бәрәңге), хәтта эчә торган суга мохтаҗ. Авыл хуҗалыгы киләсе елга чәчүлек орлыктан мәхрүм калды. Моңа өстәп, укучы балаларга мәктәп әсбаплары, язу кирәк-яраклары җитешми".
Хөрмәтле әлкилеләр! Амур өлкәсе бездән никадәр ерак булса да, мондый авыр хәлдә бер-береңә ярдәмгә килү – кешелекле гамәл, игелекле эш. Кирәк-яракларны җыеп, үзлектән посылка да салырга була ерак ватандашларыбызга, әйберләтә ярдәмне Казанда оешкан "Амур өлкәсендә су басудан зыян күрүчеләргә" пунктына илтеп тапшырырга да була. Кирәкле телефоннар, акча күчерү өчен реквизитлар мондый: Амур өлкәсендә – 8-416-2-77-07-09: 89145546604. Казанда: 8-843-5-67-81-59.
р/сч 40703810801000001418 в ОАО КБ "Восточный". г. Благовещенск.
БИК 041012718, кор/сч 30101810700000000718
"Для пострадавших от наводнения" дип куярга.