"Хузангай» җәмгыяте машина белән сыер саву операторы Фәния Шәймәрданова район данын республика конкурсында яклады

Минзәлә муниципаль районында «Заиковский» ҖЧҖ базасында машина белән сыер саву осталарының 52 нче республика конкурсы узды.

Ярышлар теоретик һәм практик өлешләрдән торды. Теоретик өлеше теорияне, ә практик өлеше — саву аппаратын сүтеп җыюны үз эченә алган.

Безнең районнан «Хузангай»ҖЧҖ машина белән сыер саву операторы Фәния Шәймәрданова чыгыш ясады.

Фәния Миңнәхмәтовна инде 32 ел авыл хуҗалыгында эшли. Үзенең бай тәҗрибәсе һәм тирән һөнәри белемнәре аркасында ул яшь белгечләр өчен бик яхшы остаз булып тора. Фәния Миңнәхмәтовна инде күптәннән яшь сыер савучыларга тәҗрибәсен тапшыра.

"Заманча техника һәм күп кенә процесслар механикалаштырылган булуга карамастан, авыл җирендә эшләү элеккечә авыр булып кала. Кайнар вакытта кешеләр иртәдән алып кичкә кадәр ялсыз диярлек эшлиләр", - дип сөйли Фәния Миңнәхмәтовна.