Иске Үргәгар авылында мәчетнең 120 еллыгына багышланган мөһим вакыйга узды
Бүген Иске Үргәгар авылында мәчетнең 120 еллыгына багышланган мөһим вакыйга узды. Үзенең гамәлдә булган елларында ул бер тапкыр да ябылмаган.
Бәйрәмгә ТР мөселманнары Диния нәзарәте башлыгы, Татарстан мөфтие Камил хәзрәт Сәмигуллин килде. Ул Әлки районы башлыгы Александр Никошин һәм имам-мөхтәсиб Ирек хәзрәт Сәләхиев белән очрашты. Алар бергәләп мөхтәсибәт үсеше һәм мәчетләр эше турында фикер алыштылар.
Район башлыгы Александр Никошин мәчет юбилее белән котлады.
Мөфти Иске Үргәгар авылы мәчетендә өйлә намазы укыды. Ул шулай ук Базарлы Матак авылында узган елның августында ачылган "Өмет" мәчетендә дә булды. Хәзер Әлки мөхтәсибәтендә 32 мәчет эшли.
Әлки районына визиты кысаларында Камил хәзрәт Сәмигуллин район башлыгы Александр Никошин белән бергә "Имәннәр" балалар лагеренда да булды.