Милләтебезнең киләчәге безнең кулларда

Милләтебезнең киләчәге безнең кулларда
Август башында Башкортстан Республикасы Туймазы районы Төмәнәк җирлегендә "Фольклор ансамбльләр аша – йолаларга" дип исемләнгән "Ак калфак" хатын- кызлар иҗтимагый оешмасының күчмә утырышы булды.  Шундый зур чарада чит илләрдән: Австралия, Египет, Кытай,  Россиянең төрле төбәкләреннән һәм, әлбәттә,  Татарстаныбыздан әлеге оешмаларның җитәкчеләре, вәкилләре катнашты. Республикабызның 45 кешедән торган зур командасы составында без дә бар идек.  
Җирле оешмаларыбызның киләчәк эшчәнлегендә кулланырлык зур  тәҗрибәләре белән уртаклашкан ут күршеләребезгә без бик рәхмәтле булдык. Утырыш кысаларында үткәрелгән "Жырлыйк әле" төбәкара фольклор ансамбльләр фестивале безгә милли рухи байлык тупларга ярдәм итте. Ул да бик югары дәрәҗәдә оештырылган  иде.
Башкорт җирлегендә яшәүче татарларның күркәм гамәлләре безне нык җәлеп итте. Аларның күплеге һәм милләткә булган мөнәсәбәте – тугрылыгы шатландыра. 
Бай эчтәлекле мастер-класслар, җанлы аралашу яңадан-яңа иҗади эшләргә канатландырды. Халкыбызның гореф-гадәтләрен, телебезне, мәдәниятебезне,  мәгърифәтебезне саклау – барыбызның да уртак бурычы. hәрвакыт бердәмлектә, бергәлектә матур-матур гамәлләр кылырга насыйп булсын, дигән теләкләр белән кайттык без. 

Әлфия Шагалиева, "Ак калфак" хатын- кызлар иҗтимагый оешмасының Әлки җирлеге җитәкчесе.