Бүген район башлыгы Александр Никошин Базарлы Матак район үзәк хастаханәсендә медицина хезмәткәрләре белән очрашты

Бүген район башлыгы Александр Никошин Базарлы Матак район үзәк хастаханәсендә медицина хезмәткәрләре белән очрашты. Әлеге очрашу кысаларында хезмәт коллективы җыелышы узды.

Районның сәламәтлек саклау өлкәсендә милли проектлар актив гамәлгә ашырыла. Алар кысаларында модульле фельдшер-акушерлык пунктлары төзелә һәм булганнары ремонтлана. Агымдагы елда шундый өч пункт ачу планлаштырыла.

Әмма бүгенге көндә районның медицина учреждениеләре өчен квалификацияле кадрлар җитмәү төп проблема булып кала. Белгечләрне җәлеп итү өчен «Земство докторы» һәм «Земство фельдшеры» федераль программалары гамәлгә ашырыла, шулай ук медицина хезмәткәрләренә торак бирелә.

Тантаналы шартларда район башлыгы район үзәк хастаханәсенең алдынгы хезмәткәрләренә һәм коллективына югары профессионализм һәм эшкә тугрылыклы булулары өчен рәхмәт белдерде.