Ышанычны аклап эшләсеннәр

«Түгәрәк өстәл» форматын сайлау анда катнашучыларга иркенләп аралашу мөмкинлеге тудыруны күз алдында тотты. Башта район советы аппараты җитәкчесе Фәнис Камалов сүз алды. "Коррупция теләсә нинди дәүләтне җимерергә сәләтле мәкерле көч ул. Бу гасыр башында ул Россия өчен дә сәяси, икътисадый һәм рухи яңарыш, үсеш юлында төп комачаулыкка әйләнде. Һәм шушы күренешкә каршы көрәштә муниципаль хакимият органнары вәкилләренә, хокук саклау органнарына зур бурычлар йөкләнә",– диде ул.
Түгәрәк өстәл артында әңгәмәдә район суда рәисе Марс Гарифинов, район прокуроры урынбасары Булат Йосыпов, эчке эшләр бүлеге начальнигы урынбасары Рамил Сәгыйтов та катнашты. Алар коррупциянең нинди рәвешләрдә булуы, аның белән бәйле җинаятьләр өчен җаваплылык турында сөйләделәр, мисаллар китерделәр. Булат Йосыпов әйтүенчә, коррупция белән бәйле җинаятьләр арасында судка кадәр җиткерелгәннәре нәкъ менә ришвәтчелек белән бәйле икән. Дөрес, авыл җирендә ришвәт "бәясе" әллә ни зур түгел – берничә йөз сумнан 3 мең сумгача. Ләкин ришвәт алу факты үзе үк җинаять, моны эшләгән хезмәткәр ил белән җитәкчелек итү системасына ышанычны какшата бит.
Муниципаль хезмәткәрләр көндәлек эшләре белән бәйле сораулар бирделәр. Ә ахырдан коррупциягә каршы юнәлтелгән законнарны ничек белүләрен тест үткәреп ачыкладылар.