«Бердәм Россия» конференциясе булды

Узган атнада Балалар иҗаты йортында "Бердәм Россия" Бөтенроссия сәяси партиясе район җирле бүлегенең 21нче  конференциясенең икенче өлеше булды.
Конференция эшендә, делегатлардан тыш, партиянең 14нче съезды делегаты, партия тарафдарларының региональ советы рәисе Валентина Липужина, Татарстан Дәүләт Советы депутаты Илшат Хәйруллинның ярдәмчесе Ирина Волостнова катнаштылар.
Депутатлар җирле сәяси совет секретаре урынбасары Динар Хәкимовның тормышында үзгәрешләр килеп чыгу сәбәпле вазыйфаларыннан  үз теләге белән азат итүне сорап язган гаризасын канәгатьләндерделәр. Яшерен тавыш бирү юлы белән әлеге вазыйфага район башкарма   комитеты  җитәкчесе урынбасары Мария Платонова сайланды.
Валентина   Липужина партиянең 14нче съездында каралган мәсьәләләр, Уставка кертелгән үзгәрешләр турында чыгыш ясады.
Партия район җирле бүлегенең 2014 елга бурычлары турында доклад белән муниципаль район советы аппараты җитәкчесе Фәнис Камалов чыкты. Делегатлар тикшерелгән мәсьәләләр буенча карарлар кабул иттеләр.
Конференциядә "Бердәм Россия" Бөтенроссия сәяси партиясенә кабул ителгән Рузия Гариповага, Елена Ензаевага, Идрис Хәмитовка, Фиргать Гайсинга һәм Фәнис Хәмитовка партбилетлар тапшырылды.