Әлки муниципаль районы

Ялган мәгълүмат бирү – җинаять

2014 елның 11 августы, дүшәмбе

Быел март аенда район суды утырышында шаһит Эльвир Зарипов та ялган мәгълүматлар биргән өчен җинаять җаваплылыгы каралганлыгы хакында кисәтелә. Тик ул судка күрәләтә ялган сөйли: хөкем ителүче Ф. Гыйләҗев узган елның 4 ноябре кичендә ап-айнык иде һәм безнең янда спиртлы эчемлекләр кулланмады, дип бара. Әмма район судының 30 апрельдә булган утырышында шул ачыклана: Югары Әлки авылында Ф. Гыйләҗев 4 ноябрьдә төнге сәгать 11 ләр тирәсендә Эльвир Зариповның өенә кергәндә үк исерек булган һәм биредә алар Л.Гыйләҗев белән тагын спиртлы эчемлекләр эчкәннәр. Шуннан озак та үтмәстән, 5 ноябрьдә төнге сәгать 1 тулганда Ф.Гыйләҗев LADA автомобиленә исерек килеш утырып чыгып китә һәм машина белән идарә итә алмыйча, юл читендәге бетон торбага килеп бәрелә. Авария нәтиҗәсендә машинаның пассажиры Л. Гыйләҗев авыр тән җәрәхәтләре ала һәм берникадәр вакыттан вафат була.

Ә Эльвир Зарипов, Ф.Гыйләҗевның авария ясаганда, ягъни җинаять кылганда айнык булуы турындагы алибиен расларга маташып, судка ялган мәгълүматлар бирә. Шул рәвешле ул РФ Җинаятьләр Кодексының 307 маддәсе 1 бүлегендә тасвирланган җинаять (шаһитның судта белә торып ялган күрсәтмә бирүе) кыла.

Прокуратура Э.Зариповны җинаять кылуда гаепләү турындагы материалларны район судына юллады. Тиздән әлеге эш судта каралачак.

БАРЛЫК ЯҢАЛЫКЛАРНЫ УКУ