Әлки муниципаль районы

Автомобильсез тора аласызмы?

2014 елның 19 сентябре, җомга

Ришат Хафизов, район электр челтәрләренең хезмәтләр реализацияләү төркеме җитәкчесе:

–Ял көннәрендә бәлки тора да алыр идем. Әмма эш көнендә мин автомобильсез яши алмыйм. Бердән, район үзәгенә Апак авылыннан йөреп эшлим. Хезмәтемдә дә машинаның гел кирәге чыгып тора. Гомумән, мин тормышымны машинасыз күз алдына да китерә алмыйм.

Раиса Алексеева, хуҗабикә, Түбән Кәчи авылы:

–Машинасыз рәхәтләнеп яшим. Гаиләбездә автомобиль юк, кирәксенмибез дә. Каядыр барырга кирәк булса, машина яллыйбыз. Җәяү йөрергә дә бик яратам. Авылыбызда машиналар күп тә түгел. Һәм бу бик яхшы, транспорт чараларының һаваны ничек пычратуы мәгълүм бит.

Наил Шәрапов, Яңа Салман авылы җирлеге башлыгы:

–Бер көн машинасыз тора аламмы? Бик рәхәтләнеп. Мин җәяү йөрергә яратам. Җәяү йөрү организм өчен искиткеч файдалы бит. Йөргәндә кан тамырлары киңәя, кешенең кәефе яхшыра. Тик менә хезмәтемне машинасыз күзаллау авыр. Безнең җирлек җиде авылны үз эченә ала бит. Аларда төрле хәлләр чыгып тора. Ашыгыч мәсьәләләр хәл итәргә туры килә. Шуңа һич тә машинасыз булмый. Алай да мин мөмкин кадәр автомобильдән баш тартырга тырышам. Авылларга килгәч машинамны калдырып җәяү йөрим.

Мария Еликова, Чуаш Борнае урта мәктәбе укытучысы:

– Юк, мин хәзер машинасыз яши алмамдыр. Рульгә утырганыма өченче ел китте. Автомобиль тормышымның аерылгысыз өлешенә, якын дустыма әверелде. Рульдә утырганда мин чын-чынлап ләззәт кичерәм, үземне чын леди дип хис итәм. Шундый көчле машинаның синең һәр сүзеңне тыңлавын, сиңа буйсынуын тою да рәхәт. Ирем әйтә, берничә көн машинага утырмасаң, син бөтенләй бүтән кешегә әвереләсең, үз-үзеңә урын таба алмыйсың, ди. Машина белән идарә итә башлагач мин үземне ирекле, тормышымның чын хуҗасы итеп хис итәм, үз-үземә ышанычым артты. Шуңадыр аз гына вакытка да машинадан баш тарта алмыйм.

Машиналарның искиткеч күп булуы зур шәһәрләр проблемасы гына түгел. Бүген авыл җирендә дә йорт саен диярлек машина. Хәтта берничәшәр. Ә бит автотранспорт планетаның биосферасын җимерә, кешенең үзенә дә әйтеп бетергесез зыян китерә. Белгечләр исәпләп чыгарган – көн саен автомобиль 3 меңнән артык кешене үтерә.

Экология һәм табигый байлыклар министрлыгы республика халкын Автомобильсез көн акциясенә бердәм кушылырга чакыра.

БАРЛЫК ЯҢАЛЫКЛАРНЫ УКУ