Әлки муниципаль районы

"Юхмачы" терлекчелек комплексында эшләүче Любовь Казаковага бик күп эш йөкләнгән

2015 елның 6 марты, җомга

Тумышы белән Каракүл авылыннан ул. Юхмачы урта мәктәбен тәмамлаган кызны язмыш җилләре Алабуга шәһәренә алып китә. Халык театры белгече дипломы алып чыккач, юллама буенча Лаешка килеп эшкә урнаша. Читтән торып Казан дәүләт мәдәният институтына укырга керә. Менә шулай 23 ел гомерен мәдәниятка багышлый.

–Әнкәйнең исәнлеге какшады. Шуңа ике дистә елдан артык мәдәният өлкәсендә хезмәт куйганнан соң туган якларыма кайтырга ниятләдем,–ди ул.

Юхмачы терлекчелек комплексына эшкә урнаша Любовь. Башта биредә терлек көтүенең өлкән операторы булып эшли. 2012 елда җитәкчелек аңа тагын да җаваплырак эш тапшыра – смена начальнигы итеп билгели.

Комплекс мөдире Марат Кәримов Любовь Казакованың хезмәтеннән бик канәгать.

–Беренче көннән Люба үзен яхшы яктан гына күрсәтте. Булсын дип, эш алга китсен дип тырыша. Хезмәт вазыйфаларын намус белән башкара. Уң кулым ул минем,–ди комплекс җитәкчесе.

Любовь Захаровнага бик күп эш йөкләнгән. Сменаны кабул итеп алгач, малларның барысын да барлап, исән-иминме икәнлекләрен карап чыга ул. Үз кул астында эшләүче савымчыларга, терлек караучыларга – барлыгы 14 кешегә наряд буенча эшне төгәл итеп бүлеп бирә.

–Терлекченең хезмәте җиңел түгел. Заманына күрә механикалаштырылган булса да, эш бер дә бетми. Бозаулар үлемен булдырмау, азык рационын контрольдә тоту, савым линияләренең дөрес эшләвен күзәтеп тору – барысы да продукциянең күләменә, сыйфатына йогынты ясаучы факторлар,–ди Любовь Казакова.

Кулыннан эш килгән, үз хезмәтен яратып башкарган Любовь Захаровна, лаеклы ял яшендә булуына карамастан, бүген дә яшьләр белән бер сафта.

–Мин бернинди эштән дә курыкмыйм. Ә батыраеп, тәвәккәлләп алынгач теләсә нинди хезмәтне башкарып чыгарга була,–ди ул.

Ленар ВӘГЫЙЗОВ.

БАРЛЫК ЯҢАЛЫКЛАРНЫ УКУ