ХӘРӘМЛӘМӘ, БАРЫБЕР ФАШ ИТЕЛӘСЕҢ

Әмма кайбер кешеләр электр энергиясен хисапсыз һәм түләүсез кулланырга, үз белдегең белән һәм теләсә никадәр алырга мөмкин булган “һава” дип санауны дәвам итәләр. Шул рәвешле алар энерги­яне урлыйлар. Электр энергиясен урлау ул ресурсларны кулланган өчен түләүдән качып, законсыз алу дигән сүз. Электрны “бушлай” кул­га төшерү күп кешеләр өчен гадәти хәлгә санала. Берәүләр моны үзләре эшләсә, икенчеләр тәҗрибәле элек­трик ярдәмендә башкаралар. Әмма асылы шул ук – исәпкә алынмаган энергия, счетчикларны урап узып, фатирларга, йортларга һәм хәтта оешмаларга агыла.

Электр энергиясен урлау про­блемасы безнең районда да бар. Бары кемнәрдер аны сизми, кем­дер белмәгәнгә салыша, ә икенче берәүләр яшереп калдырырга мата­ша. Әлки район электр челтәрләре персоналы “энергия каракларына” каршы көрәш алып бара. Аерым алганда, рейдлар үткәрә, исәп при­борларына магнитка каршы плом­балар урнаштыра. Магнитка каршы пломбалардагы сурәтнең үзгәрүе электр счетчигы эшенә магнит кыры белән тәэсир итеп тыкшыну булганлыгын күрсәтә. Мондый фак­тлар буенча актлар төзелә һәм за­кон бозучыларга кесәләрен байтак бушатырга туры киләчәк! 2017 ел башыннан бирле энергияне исәпсез куллану фактлары буенча 16 акт төзелде һәм 54422 кВт/сәг. энергия өчен 148724 сум түләтелде.

Энергетикларны закон бозучыларның намуссызлыгы гына түгел, гамьсезлеге дә гаҗәпкә калды­ра. Электр энергиясенә үз белдегең белән тоташу бит бөтен линиядә энергиянең сыйфаты кимүгә, электр челтәрендә көчәнешнең үзгәрүенә китерә. Ә болар электр приборла­рын сафтан чыгарырга мөмкин. Электр челтәренә мондый закон­сыз тоташуның нәтиҗәсе аяныч – алар янгыннарга, электр тогы сугуга китерә. Моның өчен закон бозучы сәламәтлеге һәм хәтта гомере белән түләргә мөмкин.

Гражданнарга шуны искәртәбез: РФ Хөкүмәтенең “Электр энергиясен ваклап сату базарларының гамәлдә булуы, электр энергиясен кулла­ну режимын тулысынча һәм (яисә) өлешчә чикләү турында” 442 нче (4 май, 2012 ел) Карарының (алга таба – Карары) Х бүлеге 144 пунктын­да әйтелгәнчә, исәп приборлары электроэнергетика объектларының чигендә, ягъни аларга мөмкин кадәр якын урында куелырга тиеш. Бу исәп приборларын җир участогы чигендә яисә бина (корылма) фасадында, бу участокка куелган махсус торба кисәгенә (трубостойка) урнаштыру зарур дигән сүз.

Бүген физик затларның исәп приборларының 60 процентка якы­ны йорт фасадларында һәм әлеге махсус торбаларда тора. Исәп при­борлары өй эчендә булган або­нентларга уйланырга урын бар. Счетчикны йорт фасадына чыга­рып, кулланучы бит үзен электр тогы сугудан саклый, өендә янгын хәвефсезлеген тәэмин итә. Шун­дый байтак очраклар булды: яшен­ле яңгырдан соң абонентларның өй эчендәге счетчиклары яна башлый, нәтиҗәдә күпме мал-мөлкәт юкка чыга.

Район халкына һәм юридик зат- ларга электр челтәре хуҗалыгы объектларының саклау зонала­рын бозу рөхсәт ителмәве хакын­да да искәртәбез. Саклау зонала­рында электр челтәре хуҗалыгы объектларының хәвефсез эшен бозарга, шул исәптән аларга зыян китерергә һәм юкка чыгарыр­га, шулай ук (яисә) кешеләрнең сәламәтлегенә, гомеренә, физик яисә юридик затларның милкенә за­рар салырга, экологияне зарарларга һәм янгыннар чыгарырга мөмкин булган теләсә нинди гамәлләр кылу тыела. Шулай ук электр челтәре хуҗалыгы объектларына норма­тив-техник документлар таләпләре нигезендә булдырылган керү, узу юл­лары чикләрендә электр хуҗалыгы объектларына узарга комачаулаучы нинди дә булса әйберләр һәм пред­метлар (материаллар) урнаштыру тыела.

ВЛ-0,4 һәм 10 кВ өчен саклау зоналары электрүткәргеч һава линияләре буенча – электрүткәргеч линияләрнең ике ягыннан да иң кырый чыбыклардан алар тигез торган хәлдә ВЛ-0,4 кВ өчен 2 һәм 10 метр ераклыкта параллель вер­тикаль өслекләр белән чикләнгән җир участогы өслегенең һәм һава пространствосының (һава электрүткәргеч линияләр терәкләре биеклегенә туры килүче югарылык­та) бер өлеше төсендә булдырыла.

Электр энергиясен исәпкә алу приборлары белән тәэмин итү һәм технологик тоташу мәсьәләләре бу­енча сорауларыгыз туса, куллану­чылар белән эшләү пунктына (ПРП) дүшәмбедән җомгага кадәр 8.00 дән 13.00 сәгатькәчә мөрәҗәгать итәргә яисә 8-800-2000-878 бушлай но­меры буенча контакт-үзәккә шыл­тыратырга була. Шулай ук “Сетевая компания” ААҖ рәсми сайтына ( www.gridcom-rt.ru) заявка бирергә мөмкин.

Бу уртак проблемага битараф бул­маганнар Әлки РЭСына 21-1-50 яисә 20-3-28 телефоннары буенча шылты­ратсыннар иде. Форсаттан файдала­нып шуны да әйтим: сезгә уңай бул­сын өчен смс-мәгълүмат бирү хезмәте булдырылды. Ул кулланучыларга электр энергиясен планлы өзү ихти­малы хакында хәбәр итә. Технологик тоташтыруга заявка биргәндә яисә контролерлар планлы тикшерүләр үткәргәндә үзегезнең телефон номе­рыгызны калдырырга кирәк.

Алинә СӘГЪДИЕВА,

Әлки район электр челтәрләре контролеры.