Законсыз алынган акча түләтелде

2009 елның февралендә “Лидер” кооперативы сатучылары Н.Шәрәфетдинова, Р.Вәлиева, З.Галиева, Р.Мусин күрсәтмәсе нигезендә эш итеп, эшсезләр булып район халык мәшгульлеге үзәгенә исәпкә басалар. Аларның һәркайсының исәп-хисап счетларына эшсезлек буенча пособиеләр күчерелә. Моннан тыш, Н.Шәрәфетдинова, Р.Вәлиева, З.Галиева, шулай ук Р.Мусин кушуы буенча, крестьян-фермер хуҗалыклары башлыклары буларак теркәләләр һәм үзмәшгульлек оештыруга дәүләт ярдәме төсендә субсидияләр алалар. Барлык бу акчаларны алар Р.Мусинга тапшыралар, ә ул әлеге средстволарны үз ихтыяҗларына тота. Шул рәвешле, Р.Мусинның җинаятьчел гамәлләре нәтиҗәсендә район мәшгульлек үзәгенә барысы 210805 сум матди зыян китерелә.
Район суды прокурорның искын канәгатьләндерде. Суд Р.С.Мусиннан РФ бюджеты файдасына 210805 сум акчаны түләтү хакында карар чыгарды.
Суд карары инде законлы көченә керде.