Әлки районы ГХАТ бүлегендә җиде яңа туган бала теркәлде

Район ЗАГС бүлегендә үткән айда яңа туган җиде бәби теркәлгән.

Һәрвакыттагыча, малайлар күбрәк туа – апрель нарасыйларының берсе генә кыз бала.

Узган айда Югары Әлкидә яшәүче Данис һәм Гөлназ Сәлаховларның бишенче уллары дөньяга килгән.

Ә ел башыннан ЗАГС бүлегендә 38 бәбине исәпкә алганнар. Аларның 27се – малай, 11е –кыз.

Коронавирус белән бәйле чикләүләр аркасында, узган айда туйлар булмаган. Ә ел башыннан 16 гаилә төзелгән, җиде пар араларын өзгән.

Ни аяныч, апрельдә 24 райондашыбыз арабыздан киткән. Елның беренче дүрт аенда исә 103 әлкиле бакыйлыкка күчкән.