Әлки районында Җиңү Парады булмаячак
Татарстан Республикасында хәрби парад Казанда гына узачак. Татарстанлылар чараның трансляциясен телевизор аша гына карый алачак. Татарстан Республикасы Премьер-министры урынбасары Ләйлә Фазлыева хәбәр иткәнчә, Җиңү Парады 24 июньдә Татарстан башкаласында гына узачак. Республиканың башка шәһәрләрендә һәм муниципаль районнарында парад үткәрү каралмаган. Чара иртәнге сәгать унда Кызыл мәйданда Җиңү парадын һәм Россия Федерациясе Президенты Владимир Путинның тантаналы чыгышын трансляцияләүдән башлана. Шуннан соң ТР Президенты Рөстәм Миңнеханов чыгыш ясаячак. Аннары тантаналы рәвештә Казан гарнизоны, Эчке эшләр Министрлыгы, Гадәттән тыш хәлләр Министрлыгы, Росгвардия, Россия Юстиция министрлыгы гаскәрләре, югары уку йортлары һәм республика иҗтимагый берләшмәләре вәкилләре узачак. Шулай ук хәрби һәм тарихи техника, шулай ук ретроавтомобильләр йөрү планлаштырылган, аннан соң солистлар җыелма хәрби оркестр белән бергә "Җиңү көне" җырын башкара. Салих Сәйдәшев исемендәге Зур концерт залы янында хәрби һәм тарихи техника күргәзмәсе эшләячәк. Коронавирус пандемиясе белән бәйле рәвештә, Казанда Җиңү парады тамашачыларсыз узачак. Трансляцияне ТНВ телеканалы буенча карарга мөмкин булачак.