Әлки районында силос утырталар
Җәй коры килү сәбәпле, районда планлаштырылганнан күпкә азрак сенаж салынган.
Кышлау чорында барлыгы 87 мең тонна бу азык кирәк булса, чынлыкта 51 мең тонна гына әзерләнгән. Дөрес, узган елгы сусыл азык запасы да бар әле. Ләкин бөтен өмет кукуруз силосына. Азык утарларына 96 мең тонна силос салырга кирәк. Бүгенгә аның запасы 80 мең тоннага якын.
Озак көтелгән яңгырлардан соң кукуруз сизелерлек артты, массаны күтәрде. Нәтиҗәдә, яшел массаның гектардан чыгуы 140 центнер тәшкил итә, ягъни игенчелек өчен уңайлы елларда җыелганның яртысын гына тәшкил итә. Шуңа да карамастан, хәзерге сезон өчен бу канәгатьләнерлек күрсәткеч.
Район механизаторлары көн саен траншеяларга 2-2,2 мең тонна яшел масса салалар. Бер атнадан силос салу эше тәмамланыр дип көтелә.