Әлки муниципаль районы

2014 елның 17 октябре, җомга

"Инде холыклары шәйләнә"

Игезәкләр – табигатьнең бер могҗизасы. Бу гаять сирәк күренеш тә. Район ЗАГС бүлегендә дә моны раслыйлар:

–Бездә ел саен бер гаиләдә пар балалар дөньяга килә. Күпләргә елмаймый бу бәхет,– диләр.

Аннан соң, игезәкләр туу бары нәсел буенча күчүче үзенчәлек, диләр бит әле. Чумановларга килгәндә, Сергейның да, Аннаның да нәсел-ыруында бар икән андый хәл. Сергей әйтүенчә, ул гел игезәк балалар турында хыялланган.

–Табиблар туачак нарасыйларның икәү буласын хәбәр иткәч, шатлыгым эчемә сыймады, –ди күп балалы әти.

Ул вакытта Анна әле читтән торып Казан федераль университетында укып йөри. Имтиханнар, диплом яклаулар… Май аенда ул соңгы сынавын тапшырып кайта, һәм ике көннән игезәк бәбиләр дә дөньяга килә.

Максим белән Арина икесе дә бер үк авырлыкта – 2340 граммлы булып туалар. Буйлары да бер чама була. Әмма берничә айдан Арина зуррак үсеп, малайны "узып китә".

–Игезәк булсалар да, алар икесе ике төрле,–диләр Сергей белән Анна. –Төс-битләре дә аерыла, инде холык-фигыльләренең дә төрле булуы шәйләнә. Арина тынычрак, әмма бер тавышын күтәрсә, "характерын" күрсәтә, үз дигәненә ирешми туктамый.Аллы-гөлле купшы күлмәк кигән Арина фотога төшкәндә дә үзен нәкъ кызларча тотты, объективка елмаеп, туп-туры карап торды. Максим исә башта бераз ялындырды, уенчык белән кызыктырып кына фотога төшәргә "күндерә" алдык.

Игезәк бәбиләр үстерүнең ансат булмавы сер түгел. Әмма бу гаиләдә бер генә дә зарланмыйлар, "Нәниләребез тынычлар, көйсезләнеп әллә ни борчымыйлар. Без бит күбәү, бергә-бергә карыйбыз. Алар белән кызык, рәхәт, көннән-көн үсәләр, үскән саен "һөнәрләре" арта", диләр. Аннага бәбиләрне карарга ире дә, Сергейның сеңелесе дә булышалар.

Дүртенче сыйныфта укучы Андрей белән икенчедә укучы Анастасия дәресләрдән соң музыка мәктәбенә, түгәрәкләргә, спорт секциясенә йөриләр. Буш вакытлары аз калса да, алар да әти-әниләренә булышырга тырышалар, Максим белән Аринаны бик яраталар, яннарында бөтерелеп кенә йөриләр.

Узган ел Чуаш Кичүе авылында яшәүче Радик һәм Гөлнара Вәлиевлар гаиләсендә игезәк кызлар дөньяга килде.

2012 елда Карга авылында Мансур һәм Гөлсинә Гатиннарга бәхет елмайды: ике уллары туды.

2011 елда Түбән Әлки игезәкле булды – Фәннур һәм Роза Сәлаховлар пар кызлар алып кайтты.

2010 елда Юхмачы авылында яшәүче Рамил һәм Энҗе Төхвәтуллиннарның игезәкләре–кызлары һәм уллары туды.

2009 елда Түбән Әлморзада Нургаяз һәм Румия Низаметдиновларның ике кызлары дөньяга килде.

2008 елда Ташбилге авылында яшәүче Ринас һәм Ләйсән Насыйбуллиннарның игезәк ул һәм кызлары туды.

2007 елда Иске Чаллы авылында Фердинанд һәм Гүзәлия Гатауллиннарның игезәк кызлары дөньяга аваз салды.

"Үзең үстергән тәмле дә, файдалы да"

Ишле балалы өйдә бәхет, шатлык та күп була, диләр. Дөрестән дә ул шулай. Чумановларның зур, иркен өйләрендә шундый җылы, рәхәт мохит. Бу зур йортны гаилә яшьләр программасы ярдәмендә ике ел элек салып кергән.

Капканы ачып керүгә биредә эшчән, уңган хуҗалар яшәве күренеп тора. Йорт тулы кош-корт: тавыклар, бройлер чебиләр, күркәләр, казлар һәм үрдәкләр, чуар күлмәкле мисыр тавыклары (цесарки). Ә бит Сергей да, Анна да җаваплы хезмәтләр башкаралар. Сергей Васильевич эшмәкәр – шәхси даруханә тота, ә Анна Сергеевна педагог, декретка кадәр Базарлы Матак урта мәктәбендә эшләгән. Ничек барына да өлгерәләр?

–Әле берничә ел элек без биш савым сыеры тоттык. Хәзер инде сыерыбыз бер генә. Күп сөт бирә торган нәселле ике савым кәҗәбез, кәҗә бәтиләребез бар. Сарыклар, дуңгызлар да асрыйбыз,–дип исебезне китәрде хуҗалар.

Теләгәндә барына да өлгерергә була, азрак йокларга гына кирәк, диләр. Аның каравы, гаилә табынында үзләре җитештергән сыйфатлы, тәмле ризыклар. Ит тә, йомырка да, сөт тә үзләренеке. Бәләкәй игезәкләр кәҗә сөтен яратып эчәләр икән.

Җир участоклары да зур. Быел мул бәрәңге уңышы үстереп алганнар, кәбестә, суган, помидор кебек яшелчәләр дә үзләренеке. Билгеле, эше барның ашы да бар. Балалар да кечкенәдән кул арасына кереп, хезмәткә өйрәнеп үсәләр.

Алдарак әйткәнебезчә, игезәк балалар туу – район өчен дә тансык һәм шатлыклы вакыйга. Бу көнне Чумановлар гаиләсен котларга район ЗАГС бүлеге начальнигы Рузалия Сафина да килгән иде. Ул балаларның һәркайсына матур-матур уенчыклар, урын-җир әйберләре бүләк итте, күркәм теләкләрен җиткерде. Тигезлектә һәм иминлектә, бәхетле гаиләдә үстерсеннәр Сергей белән Анна балаларын!

БАРЛЫК ЯҢАЛЫКЛАРНЫ УКУ

Сергей һәм Анна Чумановлар гаиләсендә игезәкләр – Максим белән Арина дөньяга аваз салды