Әлки муниципаль районы

2014 елның 14 ноябре, җомга

Александр Матвеев, физкультура укытучысы, Кошки авылы:

–Билгеле, товарның сыйфатлысын сайларга тырышам. Хезмәтемә бәйле рәвештә миңа спорт киемнәре һәм спорт әсбапларын еш алырга туры килә. Аларны күбрәк Казан һәм Чаллы шәһәрләрендәге спорт товарлары кибетләреннән сатып алам. Ә менә азык-төлекнең һичшиксез үзебезнең Татарстанда җитештерелгәненә өстенлек бирәм. Иманым камил, икмәкнең дә, сөт ризыкларының, яшелчәләрнең дә республикабызда үстерелгәне һәм эшләнгәне тәмлерәк тә, ышанычлырак та. Алар читтән китерелгәннәре кебек төрле өстәмәләр белән "баетылмаган", шуңа сәламәтлек өчен дә файдалырак, дип исәплим.

Галина Журавлева, хуҗабикә, Салман авылы:

–Нинди әйбер алсам да, күбрәк Татарстанныкын сайлыйм. Бигрәк тә ашамлык әйберләрен. Үзебезнең климатта, чиста һавада һәм бай туфрагыбызда үскәненә ни җитә! Билгеле, авылда яшәгәч, күп нәрсәне без үз хуҗалыгыбызда җитештерәбез. Ә ярмаларны мин Хузангайныкын яратып сатып алам. Алар тәмле, туклыклы да, кыйммәт тә түгел. Бер сүз белән әйткәндә, үзебезнең төбәктә эшләнгән продукция бүтәннәргә караганда өстен һәм ышанычлы.

Хәмдия Гәрәева, Иске Чаллы мәдәният йорты хезмәткәре:

–Мин чит ил әйберләренә кызыкмыйм. Үзебезнең җитештерүчеләр дә сыйфатлы, әйбәт товарлар чыгара хәзер. Кием-салымны да, ашамлыкны да үзебездә җитештерелгәнен алам. Ипинең без Базарлы Матак пекарнясында пешкәнен яратабыз. Агын да, карасын да шуны алабыз. Дөрес, кайчагында бераз уала торган була, әмма тәмле. Ярмаларны да, көнбагыш маен да Хузангайныкын алабыз. Аларның мае камырга да яхшы, салатларга да әйбәт. Ни генә димә, үзебездә үскәне безгә күбрәк килешә инде. Үзебезнеке тәмле дә, ләззәтле дә, файдалы да.

Татьяна Краснова, фельдшер-акушерлык пункты мөдире, Борискино авылы:

–Әлбәттә, үзебезнең Татарстанда эшләнгән товарларга өстенлек бирәбез. Итне-сөтне, яшелчәләрне, бәрәңгене гаиләбезгә җитәрлек итеп үзебез үстерәбез, җитештерәбез. Сатып ала торганнарын үз республикабызныкын сайлыйбыз. Әллә кайлардан китерелгәненә караганда үзебезнеке сәламәтлек өчен күпкә файдалырак бит. Үзебезнеке яңа өлгергән, яңа эшләнгән килеш табыннарыбызга килә. Алар озак саклансын, бозылмасын өчен төрле кушылмалар белән эшкәртелмәгән, айлар, еллар буе складларда ятмаган.

Илсөяр Гыйниятуллина, "Ромашка" балалар бакчасы хуҗалык мөдире, Базарлы Матак авылы:

–Хәзер кибетләр күп, һәркайсында товар муллыгы. Әйбер сайлый башласаң, кайларда гына җитештерелмәгәннәр. Һәркайсы үз товарын рекламалый, үзенекен мактый. Шулай да без гаиләбез белән Татарстан товарларына, бигрәк тә азык-төлегенә өстенлек бирәбез. Үзебезнеке ышанычлырак, яхшырак дип саныйбыз. Сатып алучылары күп булгач, республикабыз җитештерүчеләренә дә ярдәм. Ә Татарстанның авыл хуҗалыгы һәм эшкәртү предприятиеләре хәзер теләсә кемнең таләбенә җавап бирерлек тәмле һәм сыйфатлы продукция эшләп чыгара.

БАРЛЫК ЯҢАЛЫКЛАРНЫ УКУ

Нинди товарларга өстенлек бирәсез?