Татарстан Президенты вазыйфаларын вакытлыча башкаручы Рөстәм Миңнеханов  республикада Сабан туе бәйрәмен үткәрү турында Указ чыгарды.

Татар халкының милли бәйрәмен быел авыл торак пунктларында, район үзәкләрендә 6-7 июньдә, Яр Чаллы һәм Түбән Кама шәһәрләрендә 13 июньдә үткәрү күздә тотыла. Казан шәһәрендә Сабан туе 1 августка билгеләнгән.

16 апрельдә районыбызда эш визиты белән  Татарстан юл хәрәкәте иминлеге баш дәүләт инспекторы Рифкать Миңнеханов булып китте. Аны район башкарма комитеты җитәкчесе Александр Никошин озатып йөрде. 

Рифкать Миңнеханов район эчке эшләр бүлегенең яңа корпусларын карады. Шунда ук полициянең участок инспекторлары һәм  дәүләт автоинспекторлары белән юл иминлеген саклау буенча эшлекле сөйләшү булды. Аннан республиканың баш автоинспекторы суд приставлары, район суды, җәмәгать суды, прокуратура коллективлары белән очрашты. 

Рифкать Нургалиевич район үзәгендәге "Каенкай" балалар бакчасында да булды. Анда республика кунагына  киләсе уку елында беренче сыйныфка баручы балалар юл йөрү кагыйдәләрен ни дәрәҗәдә белүләрен күрсәттеләр. Тәрбияче Рәсимә Гыйләҗеваның юл хәвефсезлеге кагыйдәләре буенча сорауларына сабыйлар бик төгәл һәм тапкыр җаваплар бирделәр. Алар махсус мәйданчыкта тиешле кагыйдәләрне үтәп йөреп тә күрсәттеләр.